សមាជិកសហគមន៍អូរក្រសារ រួមគ្នាចុះល្បាតដើម្បីទប់ស្កាត់បទល្មើសនេសាទក្នុងដែនសហគមន៍

 

សហគមន៍នេសាទអូរក្រសារ មានផ្ទៃក្រឡាសរុបចំនួន ៤៤៦ ហិកតា ស្ថិតនៅឃុំអូរក្រសារ  ក្រុងកែប ខេត្តកែប។ សហគមន៍មួយនេះ មានធនធានជីវចម្រុះសម្បូរបែប មិនខុសពីសហគមន៍នេសាទផ្សេងទៀតឡើយ។

យ៉ាងណាក៏ដោយ សហគមន៍នេសាទអូរក្រសារ ក៏ជួបប្រទះនឹងបញ្ហាប្រឈមមួយចំនួន ជាពិសេសការកើនឡើងនូវបទល្មើសនេសាទ។ ជាការឆ្លើយតប គណៈកម្មការ និងសមាជិកសហគមន៍ តែងចុះល្បាតរួមគ្នា ជារៀងរាល់ខែ ហើយជារឿយៗតែងចាប់បាន ឧបករណ៍ខុសច្បាប់មួយចំនួន ។

ជាក់ស្តែង កាលថ្ងៃទី០១ ខែឧសភា ឆ្នាំ២០២២ ពួកគាត់ បានចុះល្បាតរយៈពេលពេញ១ថ្ងៃ ហើយបានអប់រំ និងព្រមានម្ចាស់ទូក ឱ្យបញ្ឈប់សកម្មភាពខុសច្បាប់ទាំងនោះតទៅទៀត។

បន្ថែមពីនេះទៅទៀត ការចុះល្បាតនៅក្នុងដែនសហគមន៍ ក៏បានចូលរួមចំណែកយ៉ាងសំខាន់ ក្នុងការទប់ស្កាត់ការកាប់បំផ្លាញ និងអភិរក្សព្រៃកោងកាង ផ្កាថ្ម និងស្មៅសមុទ្រ ដែលជាជម្រកដ៏សំខាន់របស់ធនធានជីវចម្រុះ៕

ជាទូទៅ សមាជិក និងគណៈកម្មាការសហគមន៍ តែងចុះល្បាត ពី ២-៣ដង ក្នុងមួយខែ ហើយរាល់សម្ភារៈ និងឧបករណ៍នេសាទខុសច្បាប់នៅអំឡុងពេលចុះល្បាត  ត្រូវបានយកទៅប្រមូលទុក៕